Нийслэлийн хэмжээнд 28 нэгжээс улсын бүртгэлийн үйлчилгээг авах боломжтой
Улсын бүртгэлийн байгууллага иргэн, хуулийн этгээдэд төрийн үйлчилгээг ойртуулах үүднээс нийслэлийн хэмжээнд одоогийн байдлаар 28 нэгжид бүртгэлийн үйлчилгээг үзүүлж байна. Тодруулбал, иргэд та бүхэн 9 дүүргийн Улсын бүртгэлийн хэлтэс болон Нийслэлийн үйлчилгээний нэгдсэн 6 төв, Улсын бүртгэлийн үйлчилгээний 13 цэгээс иргэний, хуулийн этгээдийн, эд хөрөнгийн эрхийн улсын бүртгэлийн нийт 49 төрлийн лавлагаа, үйлчилгээг харьяалал харгалзахгүй авах боломжтой.
Мөн нэгжүүдэд байршуулсан улсын бүртгэлийн цахим машин /киоск/-аар тоон гарын үсэг авах, гадаад паспортын зураг илгээх, иргэний архивын лавлагаа авах зэрэг бусад бүртгэлийн үйлчилгээг авах боломжийг бүрдүүлээд байна. Түүнчлэн цахим үйлчилгээний нэгдсэн портал болох E-Mongolia флатформоос улсын бүртгэлийн 90 гаруй төрлийн үйлчилгээг, E-Business флатформоос хуулийн этгээдийн 26 төрлийн үйлчилгээг цаг, заваа хэмнэн цахимаар авч болно.
Иргэдийн хэрэгцээнд тулгуурлан Улсын бүртгэлийн байгууллага нь амралтын өдөр буюу Бямба гарагт ажилладаг нэгжтэй болсон бөгөөд одоогоор Хан-Уул дүүргийн “Буянт-Ухаа” ОУНБуудал дахь улсын бүртгэлийн үйлчилгээний цэг мөн Сүхбаатар дүүргийн “Их тойруу” дахь улсын бүртгэлийн үйлчилгээний цэгүүд ажиллаж эхлээд байна. Иймд та бүхэн хүн амын төвлөрөл, замын ачаалал, цаг заваа тооцоолон өөрт ойр байрлах нэгжээс бүртгэлийн үйлчилгээг түргэн, шуурхай авах боломжтой юм.
