ХҮНДЭТГЭЛИЙН ТАНХИМ нээлтээ хийлээ

Өмнөговь аймгийн Засаг даргын "Нутгийн хишиг" хөтөлбөрийн хүрээнд хэрэгжиж байгаа "Залуус" хөтөлбөрт тусгагдсаны дагуу залуу гэр бүлийн гэрлэлтийг бүртгэх, баталгаажуулах хүндэтгэлийн танхим нээлтээ хийлээ.

Аймгийн Засаг Даргын Тамгын Газар, Гэр Бүл, Хүүхэд залуучуудын хөгжлийн газар, Улсын бүртгэлийн хэлтэс хамтран төрийн үйлчилгээг иргэдэд илүү ойртуулж, иргэнд ээлтэй шинэлэг үйлчилгээг нэвтрүүлж байна.

Улсын бүртгэлийн хэлтэст нээгдэж байгаа энэхүү танхимд хосууд гэрлэлтээ бүртгүүлэхээр ирэхдээ дурсгалын зургаа татуулж, Гэр бүлийн тухай хуулийн дагуу гэрлэсэн хосууд бие биедээ хайртай хүндэтгэлтэй байж, он удаан жил үнэ цэнэтэй гэр бүлийн гишүүд байхаа илэрхийлж, энэ сайхан дурсгалт мөчөө үргэлж дурсаж байхын билэгдэл агуулж байгаа билээ. Намрын сүүл сарын шинийн 23-ны хүчин төгсөх, арвидах дэлгэрэхийн билэгт сайн өдөр 5 залуу хосууд ГЭРЛЭЛТЭЭ БАТЛУУЛЖ аймгийн Засаг даргаас гэрлэлтийн гэрчилгээгээ гардан авлаа. Цаашид энэхүү танхимд олон залуу гэр бүл гэрлэлтээ батлуулж, үүд хаалга нь хүн бүрийн өмнө үргэлж нээлттэй байх болно. Өнөөдрийн билэгт сайн өдөр ГЭРЛЭЛТЭЭ БАТЛУУЛСАН ЗАЛУУ ХОСУУДДАА эрүүл энх, урт удаан хамтдаа амьдарч, олон сайхан хүүхэдтэй өнөр өрх гэр бүлийн хос багана байж, үнэ цэнэтэй, аз жаргалтай сайхан амьдрахыг хүсэн ерөөе.